اسلام حويلة يكتب عن أسعار السيارات :"العميل هو السيّد" والعبث سيد الموقف

موضوع ارتفاع أسعار العربيات موضوع قتل بحثا ، والنقاش فيه شيء من العبث، لا العميل ح "يقتنع" بكلام الوكيل، ولا الوكيل ح "يقنع" العميل.. الوكيل شايف طول الوقت انه مش بيكسب زي الناس ، والمواطن شايف ان الوكيل بيكسب مبالغ خرافية.. مفيش منطق مع العبث.
 

حتى القاعدة الاقتصادية الأولى، العرض والطلب ،حتلاقي ناس بتشكك أصلا في العرض والطلب، يعني استمرار للعبث طول الوقت.

امس كتبت عن ارباح شركات السيارات العالمية من كل وحدة بيتم بيعها، احد السادة المتابعين طلب انى اكتب عن ارباح شركات السيارات في مصر.

الوضع في مصر مختلف خالص عن بره ، الشركات العالمية لازم تفصح بكل شفافية عن كل التفاصيل، لان ببساطة كل الشركات مطروحة في البورصات، وبيتم اعلان النتائج بصورة كاملة ، لأن فكرة انك تخفي معلومة وما يتبعها من ضرر للمساهم أو حتى للدولة (تقليل ضرائب وما شابه) بيعّرض الشركة لاحتمالية كشف امرها وبالتالي عقوبات ضخمة جدا سواء غرامات مالية أو الحبس، ده غير السمعة اللي ممكن تكبّد الشركة خسائر ضخمة.
 

لكن بعيدا عن أرباح الشركات ، ممكن أكلمك عن أسعار الشحن البحري من الصين مثلا، وازاي العوامل الجيوسياسية بتأثر بشكل كبير في ارتفاع الأسعار.
 

قبل أزمة البحر الأحمر كان سعر الحاوية 40 قدم يتراوح من 1000 الى 1500 دولار، حاليا سعر شحن الحاوية نفسها بيتراوح ما بين 6000 الى 7000 دولار ، ده غير 700 دولار تفريغ حاوية، يعني ممكن نقول متوسط 7500 دولار للحاوية اللّي بتشيل 3 عربيات.
 

السعر ده يتم اضافته لسعر فاتورة المصنع، وبعد كده يتم احتساب الجمارك والضرائب والرسوم (67%) على اجمالي السعر..

معلومة ع السريع “رسوم فتح الحاوية 16 ألف جنيه”

طاه ما المستورد بيدفع زي الوكيل في الشحن والسعر أرخص بكتير؟
 

ده حقيقي.. لكن في تفاصيل كتير تانية ممكن نتكلم عليها بكرة، لكن خد بالك من أهم قاعدة تجارية في العالم كله.. "العميل هو السيد"، يعني احسب حسبتك وخد قرارك
 

بالمناسبة..سعر العربية الواحدة شحن رورو من الصين بـ2000 دولار ، بس للأسف الرورو الجاي مصر بقى من النوادر