جيلي .. اللّي فات حمادة واللّي جاي حمادة تاني

معنديش احصاء دقيق لشبكة توزيع علامة جيلي في مصر، بس أعتقد انهم في حدود 40 موزع، وده رقم كبير حتى لو كانوا اثنين وكلاء.

لكن احنا ممكن نستنتج من ده التصور اللي حتكون عليه علامة جيلي خلال السنين الجاية، يعني العدد ده من الموزعين مش بالصدفة أو بالبركة ، ماهو اصلا مفيش استيراد عشان يعرفوا ياخدوا عربيات.

لو استعرضنا أداء جيلي من يناير 2024 وحتى نهاية أغسطس ، حنلاقي ان اكثر من ثلاث ارباع مبيعات جيلي جاية من موديل GX3 (1569 وحدة) ، وبقية الـ4 موديلات مكملوش ربع المبيعات ، ومع ذلك في توسع وانتشار للعلامة عبر شبكة التوزيع.

وده ينقلنا لنقطة مهمة ، جيلي وهي شركة لا غبار عليها عالميا، شايفة نفسها في مصاف الكبار ، تملك فولفو ولوتس وحصص حاكمة في استون مارتن ومرسيدس وبروتون.. حقها ولا مش حقها.

وعشان كده تسعيرهم أعلى من منافسيهم ، شايفين ان التكنولوجي المقدم في عربياتهم يستاهل ثمنه ، ومع التطور الدائم بيبقى السعر في تطور دائم برضه.

جيلي الأم هي اللّي بتسّعر موديلاتها مش وكلاءها، على الأقل من لحظة ما بقوا وكيلين ، ويمكن ده السبب في تسعير ستارراي اللي كان من وجهة نظري مبالغ فيه – بالمناسبة هي برضه وجهة نظر الوكيلين- وده انعكس على المبيعات (39 وحدة). لكن حتى الرقم ده في ظل ارتفاع السعر ووجود منافسين عتاة يعتبر معقول.

لكن كل اللّي فات حمادة واللّي جاي حمادة تاني

امجراند السيدان المنتظر طرحها خلال الاسابيع القادمة يتوقف نجاحها ونجاح أداء العلامة على تسعيرها ، ولكم في GX3 مثل، انضباط السعر يقابله كثافة في المبيعات.

امجراند عربية محترمة ، وهي السيدان الوحيدة ضمن موديلات جيلي عالميا ، واعتقد ان الاستثمار في تجميع امجراند وبعدها موديل SUV مع العدد ده من الموزعين بيقول ان في خطة لتواجد علامة جيلي ضمن الـ3 الكبار في السوق.. بس تفضل النقطة الأهم.. السعر كام؟

لو افترضنا ان اسعار اليومين دول ثابتة، يبقى من وجهة نظري سعر الفئة الأولى تقل عن مليون جنيه وان الفئة الأخيرة لا تزيد عن مليون و200 ألف جنيه.