تراخيص ديسمبر : نيسان وMG أعلى أداء و "صياح" السوشيال .. مجرد "صياح"

نكمل كلامنا على آداء العلامات المختلفة بناء على تقرير تراخيص العربيات الملاكي لشهر ديسمبر ولسنة 2024.

👈علامة نيسان حققت أعلى معدل تراخيص في السنة كلها، 1752 وحدة ، وده برضه تاني أعلى آداء في السوق كله خلال 2024 بعد علامة شيري في شهر أغسطس، نيسان صني تحديدا كل ما أصوات تسأل فين تحديث الموديل ، المبيعات ترد وتقول أغيّر ليه وانا افضل مبيعات في السوق، ده غير ان الشكل ده مطلوب جدا في العراق وليبيا وبعض دول أفريقيا عن الشكل الأحدث.

👈علامة MG في الترتيب الرابع في التراخيص، 1520 وحدة، برضه اعلى معدل آداء خلال السنة كلها، علامة صينية كل موديلاتها مستوردة بالكامل، حتى تصميمات الموديلات الاكثر مبيعا مش ثورية، وتعتبر كلاسيكية لكن رغم ده وزي ما قلت قبل كده هي في كفة وباقي العلامات الصينية مجتمعة في كفة (باستثناء شيري).. انا بكلمك على ارقام مبيعات رسمية وحكومية.

إقرأ أيضا للكاتب إسلام حويلة :

تقرير تراخيص ديسمبر: دولار اطلع.. مبيعات تكتر.. وجيتور T2 عاملة "عظمة"
 

طاه ما تقول الترتيب؟

1️⃣علامة نيسان بـ1752 وحدة

2️⃣علامة شيري بـ1607 وحدة

3️⃣علامة هيونداي بـ1557 وحدة

4️⃣علامة MG بـ1520 وحدة

👈تويوتا.. وما أدراك ما تويوتا..756 وحدة.. سيبك من كورولا وانها خلاص بقت ختم الجودة، انا بتكلم عن اوربان كروزر تحديدا، 104 وحدة في ديسمبر، ده في علامات مبيعاتها بكل موديلاتها اللي بتقول بابا وماما محققتش 100 عربية.

هو كله صيني ومحلي.. فين الاوروبي؟

👈ماشي.. الطبيعي اتكلم عن علامة BMW لكن حتحتاج مساحة اكبر فنخليها لبكرة ، ملاحظ أداء علامة سكودا، مع جيل جديد من كودياك وفيس ليفت من أوكتافيا الطبيعي انها تعمل مبيعات ، لكن مع الهجوم عليهم وعلى تسعيرهم برضه باعوا نفس المعدل.

إقرأ أيضا للكاتب إسلام حويلة :

الأوروبي الأول في 2024 والصيني حيكتسح في2025.. والكهربا في 2030
 

نيجي لأهم حاجة ممكن نطلع منها من تقرير تراخيص سنة 2024 وشهر ديسمبر، السوشيال ميديا تأثيرها لا يتعدى الـ20% بالكتير على قرار الشراء ، مش عايز أقول ان كل شهر بيطلع التقرير بيثبت ان "الصياح" ده افتراضي بس، الواقع حاجة تانية خالص.

‼الغريب والعجيب والمثير ان كل العلامات اللي شغّالين عليها صياح ، مبيعاتها في العالي، وكل العلامات والموديلات اللي شغّالين عليها مدح مبيعاتها في النازل‼

بس متقولش مبيعات ⛔ ماشي نكمّل بكرة