الأوروبي الأول في 2024 والصيني حيكتسح في2025.. والكهربا في 2030

تعالوا نشوف شوية أرقام وملاحظات تراخيص سنة 2024مع احتساب شهر ديسمبر بمتوسط مبيعات لان التقرير لسة مطلعش، ونشوف التوقعات للأرقام دي خلال سنة 2025.

لسة العربيات الاوروبي متفوقة في المبيعات بنسبة 31% من حجم سوق العربيات الملاكي، وبعدها العربيات الصيني بنسبة 27% والياباني بنسبة 20% وأخيرا الكوري بنسبة 19%..طبعا النسب دي داخل فيها استيراد وتجميع محلي.

نسبة مبيعات أو تراخيص العربيات المجمعة محليا حوالي25% وطبعا الـ75% الباقية استيراد.

13 موديل بس قدروا يبيعوا أكثر من 3000 وحدة في السنة ، وهما بالترتيب كيا سبورتاج ونيسان صني وتويوتا كورولا وهيونداي توسان و MG ZS و BYD F3 وهيونداي اكسنت وشيري تيجو7 ومرسيدس C-Class وسكودا كودياك وفولكسفاجن تيجوان وهيونداي AD.

اكتر شهر تراخيص كان شهر يوليو وأغسطس.. الغريب ان الشهرين تقريبا بنفس رقم التراخيص 17,223وحدة ، في حين اكتر علامة رخّصت عربيات في شهر واحد كانت علامة شيري بـ 1,792 وحدة في شهر أغسطس.. وأقل شهر في التراخيص كان شهر مارس بـ 7,286 وحدة.

مفيش موديل قدر يرخّص ألف عربية في شهر واحد، يمكن نيسان صني الوحيدة اللي وصلت لـ914 ترخيص في شهر أغسطس ، وبعدها BYD F3 بـ888 وحدة، أما بالنسبة للمستورد، كيا سبورتاج رخّصت في شهر أغسطس 842 وحدة ،المركز الثاني كان تويوتا كورولا بـ759 وحدة ،بس في شهر يوليو.

تراخيص العربيات الكهربا من 1 يوليو سنة 2021 وحتى 30 نوفمبر 2024 يعني في (41 شهر) عددها 8975 وحدة، طبعا مش محصلة مبيعات شهر واحد من البنزين، صحيح الوتيرة زادت في الشهور الأخيرة بمتوسط 500 عربية في الشهر، لكن نسبتها الى نسبة العربيات العادية حوالي 0.04%.. يعني نبقى نشوف حتوصل كام في 2030.

ايه التوقعات في 2025؟

العربيات الصينية نسبتها حتعدّي الـ32% وحتبقى رقم واحد والاوروبي حينزل لرقم اثنين.

نسبة التجميع المحلي (8 موديلات جديدة ع الأقل) حتوصل لـ35% بنهاية 2025، وهيونداي AD حتعدي مبيعاتها نيسان صني.

اتوقع نزول الفايدة حوالي 8% خلال 2025 وده حيساعد على زيادة حجم المبيعات.

كل ما سبق لو فضل الحال على ماهو عليه