تراخيص أكتوبر.. صني رجعت الأول و AD التاني.. وأداء "الفواخر" مش هو

"أقول لمتابعيني ايه؟"..

أقولهم ان مفيش أثرياء في مصر؟

 يعني ايه رولزرويس كولينان واحدة بس تترخص في اكتوبر؟

إزاي واحدة بنتلي فلاينج سبر بس؟

فين الفيراري واللامبورجيني؟

بلّغ رجال الأعمال احتجاجي الرسمي على اللّي بيحصل

يابنى فوق انت مش بتمثل " أيام السادات"

معلش.. أخدتنى الجلالة ،خلينا نتكلم عن تقرير تراخيص أكتوبر

على هامش مؤتمر الـEVs في اكتوبر اللي فات سألت المهندس محمد عبدالصمد الرئيس التنفيذي لشركة نيسان مصر، مبيعات صني انخفضت بشكل كبير في أغسطس وسبتمبر.. ايه السبب؟

كانت الإجابة الطلب الزائد للتصدير ، وقالي بشكل واضح ،في تقرير اكتوبر الوضع حيتغير.. وقد كان

نيسان صني الأكثر ترخيصا في شهر أكتوبر ورقمها تضاعف عن سبتمبر يليها هيونداي النترا AD اللي حققت قفزة كبيرة ،والثالث تويوتا كورولا ، وBYD F3 وMG ZS الرابع والخامس.

بس المفاجأة بالنسبالي كانت في فولكسفاجن تيجوان انها تيجي كسادس موديل ترخيصا.

حنلاحظ ان في 20 موديل بس بيشكلوا أكتر من 50% من مبيعات السوق المصري في أول 10 شهور من 2024.

لو جينا على نسب الاستحواذ على المبيعات حنلاقي الـTop 5 كالتالي:

كيا سبورتاج 4.7% - تويوتا كورولا 4.2%- نيسان صني 4%- هيونداي توسان 3.7%- إم جي ZS 3.4%، ودول بيشكلوا 20% من مبيعات سوق الملاكي.

الملاحظ بشكل عام ان المبيعات كانت سيئة، وده انعكاس لحالة السوق الفترة اللي فاتت، يمكن بسبب الاوفر برايس ، يمكن بسبب صعوبة الاستيراد ، صحيح التراخيص قلت حوالي الف بس عن سبتمبر ، بس في علامات اتأثرت بشكل كبير جدا وانخفاض تراخيصها أكثر من 50%.

طب هو ايه اللي سند السوق؟

هيونداي ونيسان وشيري وتحديدا موديلات التجميع المحلي

بالمناسبة.. فعلا في تراجع كبير في تراخيص "الفواخر" بشكل ملحوظ، رغم ان عربيات كتير "مرطرطة" عند التجّار