فصل الكلام عن أسعار Exeed.. طالما هاجموا يبقى حتبيع كويس

النهاردة في مؤتمر تدشين علامة Exeed وزيارة مصنع EGA، أحد الزملاء سألتني..ايه رأيك في أسعار العربيات ؟ واسترسل ان كتير من السوشيال ميديا انتقدوا وهاجموا الأسعار؟

قلتله كده Exeed حتبيع كويس أوي ..طبعا استغرب من ردي

شركة فيراري بتكسب في العربية الواحدة 27% وبورشة بتكسب 18%، وده معلن مش سر ولا حاجة، محدش طلع قال ان اسعار فيراري وبورشة مبالغ فيها، محدش قال عليهم "حرامية"، والشركتين ما شاء الله محققين ارباح ضخمة.

حضرتك متخيل ان شركة ما بقالها سنين وسنين بتشتغل وعندها جيش موظفين واستثمارات وغيره، منتظرة من سيادتك تسّعر عربياتها مثلا؟!

السعر غالي يبقى الشركة تتحمّل نتيجة قرارها، ترجع فيه ، تكمّل .. في النهاية احنا كصحفيين بنكتب عن آداء ومبيعات.. عربيات كتير نزلت أقل من سعرها ومحققتش مبيعات، في مقابل عربيات بتتباع بأوفر برايس معدي الـ500 ألف جنيه.

المسألة ليها علاقة بالعرض والطلب ، مش بكتابات على فيسبوك وانستجرام
 

اللّعب على حكاية اسعار العربيات بيجيب مشاهدات كتير ، سعر غير عادل، اسعار خيالية ، اسعار من المريخ، خليها تصدي وبلا بلا بلا بلا..بس على الأرض مالوش تأثير يذكر

حضرتك عارف ان كل العربيات اللي اتهاجمت وان سعرها غالي وخليها تصدي، هي أكتر عربيات بتبيع في مصر وعليها اوفر برايس؟
 

طب حضرتك عارف ان أغلب العربيات اللّي بيتم الترويج ليها عن طريق "جهابذة" السوشيال ميديا مبيعاتها "تكسف"؟
 

ايوة.. يعني انت شايف ان الاسعار كويسة؟

يا "عمونا" كويسة ولا مش كويسة مش حتفرق معايا ، باعوا كويس يبقى همّا صح ، ما باعوش يبقى همّا غلط.. وفي الحالتين همّا اصحاب القرار سواء كسبوا أو خسروا.. انا عن نفسي عايزها تبقى ببلاش مش بفلوس أصلا.

سيبك انت.. الواحد حس بسعادة حقيقية وهو شايف مراحل تجميع العربية وخروجها من المصنع بجودة وخامات عالية أوي ، وبنسبة مكونات مصرية 45% وبشهادة منشأ مصري، والأهم تصريح السيد ياسر صالح الرئيس التنفيذي لـ"ناتكو" ان في اتفاق مع شركة Exeed على تصديرها لدول عربية.