اسلام حويلة يكتب :

ملاحظات من تقرير تراخيص نوفمبر.. وكوبرا ليون الجديدة وصلت مصر

كوبرا ليون

تقريبا مفيش فرق بين عدد تراخيص العربيات الملاكي في شهر نوفمبر(12354 وحدة) عن شهر أكتوبر(12753 وحدة)، أقل 299 عربية بالتحديد، يعني اجمالا تقدر تقول ان السوق مستواه ثابت ، لكن لمّا تشتغل على الأرقام تلاقي مؤشرات غير جيدة لعلامات كتير.

لعبة تبادل الكراسي لسة موجودة بين هيونداي وشيري، الشهر ده هيونداي بـ1475وحدة طلعت أول وشيري بـ1416 نزلت تاني ، نيسان بـ1223 طلعت للمركز الثالث وتراجعت MG للمركز الرابع بـ899 وحدة وعلامة مرسيدس الخامس بـ845 وحدة.

مش عايز أكون بحكم بدري، بس تجربة وكيلين لعلامة واحدة (جيلي) غير جيدة بالمرة، وده ظاهر بوضوح في أرقام التراخيص اللّي لا تتناسب اطلاقا مع اسم العلامة ووجود وكيلين وعدد موزعين كبير.. في حاجة غلط

علامة MG عدد تراخيصها أكبر من تراخيص علامات (جيتور+ بايك +جيلي+ GAC+ Jac) مجتمعة، رغم ان MG نفسها نازلة حوالي 200 وحدة عن اكتوبر.

في علامة استفهام كبيرة بالنسبالي عن آداء العلامات الصيني باستثناء شيري و MG، هل زحمة العلامات والموديلات خلّت عملاء كتير يروحوا للمضمون ويشتروا دماغهم؟ حجم تراخيص باقي العلامات الصيني 969 ولو ضفنا BYD حيبقوا 1231 عربية يعني 10% بس من حجم السوق.

اكتر نسبة نمو كانت لعلامات نيسان وفيات وأوبل وكوبرا و GAC ، وأكتر نسبة تراجع كانت لعلامات جيلي وميتسوبيشي وكيا و BYD وفولكسفاجن.

انا بتكلم عن آداء علامات، يعني ممكن حد يقول ان الاستيراد الشخصي كتير في علامة معينة، وارد طبعا وموجود، بس ثقة العميل بالعلامة نفسها ده مؤشر مهم ، معنى انه اختارها فده معناه سعر اعادة بيع كويس، قطع غيار في كل حتة.