اسلام حويلة يكتب : الأفضل في 2024 وتوقعات 2025 .. وديزاير "حتشقلب" السوق

في سقعة الساعات الأخيرة من 2024 قلت أشاركم الرأي في بعض الحاجات في السوق..

🥇لو حختار أفضل عربية نزلت في 2024 فهي هيونداي النترا AD ،في 6 شهور مبيعاتها عدت 3 آلاف وحدة وأعتقد حتكون رقم 1 في مبيعات التجميع المحلي في 2025.

👈أفضل عربية صيني نزلت هي جيلي ستار راي، لكن سعرها للأسف "لبّسها في الحيط"

👈أفضل عربية اتعمل لها بروباجاندا كانت جيتور T2 ، لكن عدم توافرها حيضيع عليها فرصة مبيعات كبيرة جدا.

👈اكتر عربية اتظلمت هي دونج فينج هيوج.. المفروض تكون مبيعاتها أفضل من كده بكتير

👈اكتر عربية مبيعاتها الكبيرة كانت غير متوقعة هي فولكسفاجن تيجوان، لسة زبون "الأوروبي" بخير.

🏆أفضل عربية "كهرباء" بس هي غالية حبتين تلاتة BMW i5 ..مذهلة بمعنى الكلمة.. وكان أفضل اطلاق لعربية برضة BMW 5Series

😃أفضل خبر في السوق كان اقامة مصنع المنصور للسيارات.. وأسوء خبر كان غلق الـAcid number😡

ايه ده.. كله تاريخ.. عايزين المستقبل يا مولانا

تقصد توقعاتي لـ2025، خد عندك..

♨️هيونداي الأول وشيري التاني و MG ونيسان يعني يبقى الوضع على ماهو عليه كـ Top4 مبيعات، أعتقد جيلي حتنافس تويوتا ع المركز الخامس.. مش عشان وكيلين.. عشان التجميع المحلي.

🔥نيسان ماجنيت،جيلي كول راي، شانجان CS55 Plus ده احنا حنشوف "مدعكة" في مبيعات الـ SUV في نص 2025 التاني.. بعد "عركة" السيدان في النص الأول.

📢سوزوكي ديزاير "حتشقلب" الفئة بتاعتها ، واقل واجب تبيع لها 1000 عربية كطلعة أولى.. اعتقد حتبقى "فرس الرهان" ان جت بكميات

بينى وبين اثنين أصدقاء رهان على مبيعات Exeed في 2025، الصديقين من شركات السيارات الكبرى، الأول استاذ تسويق والتاني استاذ مبيعات..حكشف عن الرهان بعد العيد الصغير.

بالمناسبة .. الأيام الجاية كل وكلاء السيارات في مصر حيشتغلوا زي خلايا النحل ، في 2025 كله رافع شعار "ياروح ما بعدك روح"..

ان شاء الله سنة 2️⃣0️⃣2️⃣5️⃣ كلها خير وحب علينا وعلى مصر ..كل عام وانتم بخير 🎊