جيلي ستار راي خلال أيام في مصر.. الحكومة فين؟

السيارات زيها زي اي منتج في البلد مستني الحكومة، انا وانت مستنيين الحكومة ، مصر كلها مستنية الحكومة، صندوق النقد الدولي ذات نفسه مستني الحكومة.. طب الحكومة نفسها مستنية ايه؟
محدش عنده معلومة قاطعة، يمكن تكهنات.. شائعات.. استنتاجات أو نمشيها توقعات..تعالى نشوف الوضع عامل ايه؟
سنة 23 كان عليك التزامات حوالي 23 مليار دولار، كانت ايرادات قناة السويس تاريخية، والسياحة ماشية "مجري اكسبريس" (14.9 مليون سائح).. وفي نسبة نمو في الصادرات مع غلق شبه تام للاستيراد.
في المقابل انخفضت تحويلات المصريين في الخارج بشكل كبير(اكترمن 30%) وارتفع دولار السوق الموازي بشكل اكبر بكتير.
دخلنا سنة 24 بوصول دولار السوق الموزاي لأعلى سعر في التاريخ (73 جنيه) ، انخفاض حاد في ايرادات قناة السويس (65%) ، انخفاض حاد في اعداد السياح (30%) واستمرار حالة تحويلات المصريين بالخارج، وصندوق نقد قالك معلش انت عندك عجز كبير حترد الفلوس ازاي ؟ وجاب ورا وبقى "يتلكك".
صفقة تاريخية ضخت 15 مليار دولار في خزينة البنك المركزي وخلال شهرين في 20 مليار كمان ، تعمل ايه بقى؟
عندك 42 مليار دولار التزامات ، التوتر ع الحدود الشرقية متصاعد ، حرب اهلية في الجنوب ونزوح مئات الآلاف لعندك، أزمة البحر الأحمر بقت اصعب وأصعب.
تعوّم وبعد خمس او ستة شهور تلاقي نفسك مش قادر تسدد؟
ولا اصبر واكسب وقت يمكن أزمة حوالينا تتحل..بس في نفس الوقت حيرجع الدولار يزيد، والاسعار بدل النزول تستمر في الطلوع.
هل الكلام على استثمار سعودي وقطري بنفس فكرة الاستثمار الاماراتي حيحصل واحنا مستنيين الوقت الأنسب لاتخاذ قرارات؟ ولا الكلام كله في الهوا ومفيش حاجة؟

بالمناسبة..ابوغالي موتورز حتقدم جيلي ستار راي لأول مرة في السوق المصري خلال أيام ،العربية بتنزل برة بمحرك2 لتر، بس هل حتنزل مصر بنفس المحرك؟ خلينا نفتكر ان ابوغالي موتورز نزلت عربيتين سوبارو بمحرك 2 لتر وكان سعرهم منافس جدا.