اسلام حويلة يكتب : الأسعار ح تنزل ولا ح تطلع .. يعني نشتري امتى؟

لو سألت السيد حسن عبدالله محافظ البنك المركزي المصري ذات نفسه وقلت له سعر الدولار ح يطلع ولا ح ينزل امام الجنيه؟ مش ح تاخد اجابة قاطعة ، لان ده مرتبط بكتير من العوامل الداخلية والخارجية ، واللّي محدش يقدر مهما بلغ علمه واطلاعه على باطن الأمر انه يجاوبك ع السؤال ده..لكنها تقديرات ممكن تصيب وممكن تخطئ.

رأيي ان توقعات مؤسسة كابيتال إيكونوميكس البحثية اللي نُشرت من يومين هي الأقرب للتحقق، واللي بتقول ان الدولار رايح 49 جنيه بنهاية عام 2024، وانه ح يوصل 55 جنيه بنهاية 2026.

قبل ما تتشحتف وتجهش بالبكاء وتتهمني بالعمالة واوهام ملهاش آخر في عقلك الباطن، قولي حاجة جيوسياسية واحدة بس حوالينا تخليك شايف العكس.

يعني اسعار العربيات ح تطلع تاني ؟

توقعاتي ح تطلع وح يرجع الاوفر برايس بشكل أعنف

بس في شركات بتنزل اسعارها؟

أيوة دي حقيقي .. لكن يا ريت تشوف قصة الانخفاض بشكل اوسع، الدولار نزل من 70 لـ47 جنيه، الشركات انتظرت شوية بعد التعويم وبعدين بدأت في تخفيض أسعارها ، وده الطبيعي والعادي.

لكن هل في شركات خفضت مرتين؟

هما شركتين اثنين بس في السوق كله ، الأولى لظروف محددة بتواجه الشركة الأم من تغيير الاسم وضعف المبيعات عالميا وبالتالي ضغط الوكيل وأخد كميات كبيرة مقابل تخفيض السعر من المصنع.

والشركة الثانية وكيل محلي"بيخلص" المخزون ومش ح يجمّع العربيات دي تاني.

قلتها قبل كده اكتر من مرة.. صحيح سعر الدولار هو العامل الأساسي في التسعير، لكن توافر العربيات عامل مهم جدا، ف طول ما الاستيراد واقف والكميات شحيحة السعر ح يزيد.

لا يا عم .. الشركات معندهاش حل غير تخفيض الأسعار وإلّا العربيات حتصدي ويبيعوها خردة؟

أيوة انت صح ..استنى لغاية ما تصدي وبالمرة تتجوز "هنومة"

بالمناسبة.. شيري تيجو 4 برو نازلة بشكل رسمي الثلاثاء وحتكون في الشريحة السعرية من 800 ألف الى مليون جنيه، بين تيجو3 اللي انتهت وبين تيجو 7 .