اسلام حويلة يكتب : بايك والجودة والكماليات.. صدّقنى حترجع منافسة سعرية

خلينا نتفق ان الشركات الصينية اصبح لديها من الجودة والمواد المستخدمة في صناعة عربيات ما يوازي الشركات الأوروبية واليابانية، لأن ببساطة الموردين لمصانع مرسيدس وBMW وفولكسفاجن وغيرهم همّا نفسهم بقوا موردين للشركات الصينية ع الأقل الشركات الكبيرة في الصين.

وبالتالي مش غريب انك تشوف عربيات بايك اللي اتقدمت امس بجودة عالية جدا وخامات ممتازة، وطبعا حتلاقي كل الاوبشن متاحة ،وصدقنى لو سألت أي مواطن شاف العربيات حيقولك نفس الرأي.

ده ينقلنا لمنطقة تانية خالص،بدأت تظهر من بعيد.... وبعدين؟

اكسيد نازلة كمان شهرين تلاتة، كايي نازلة في يوليو، اكسبنج ع الأبواب، نزول الجيل الأحدث من موديلات هافال وشانجان، ده غير الجديد من MG وGAC وشيري وجيلي، واقدر أقولك انهم حيكونوا على درجة كبيرة جدا من الجودة وغرقانين كماليات.

وكلامي للوكلاء تحديدا، لو شخص مقرر يشتري عربية حيختار أي علامة منهم؟

الجودة مش حتقدر تفرقها ..الاوبشن كله موجود.. عروض صيانة وخدمات كله ح يعمل ، خد بالك انا مجبتش سيرة عربيات زي سبورتاج وتوسان ولا علامات زي بيجو وسكودا.. الأصعب انك تقنع عميل رايح يشتري واحدة من دول وتخليه يشتري علامة صينية أغلى وسعر اعادة بيع "في أفضل الأحوال" أقل.

بالتأكيد في عملاء عندهم روح المغامرة والجسارة ، لكن أضعافهم ح يفضّلوا يشتروا المضمون في وقت صعب اقتصاديا وكل شوية بيصعب.

أيوة يعني عايز تقول ايه؟

عايز أقول ان السعر ح يرجع من تاني يكون هو الفيصل في تحديد شكل المنافسة، مع اسم الوكيل وقوته ، يعني كفاية الحد الأدنى من التجهيزات المطلوبة "بناء على استطلاعات رأي" ، ومش بس كفاية سعر العربية مهم جدا كمان سعر قطع الغيار والصيانة ، يعني تضغط على المصنع وتاخد سعر أفضل.

بالمناسبة .. شركة بايك من الستة الكبار في الصين وعندها شراكات قائمة مع مرسيدس وجيب وهيونداي ، عشان كده متسغربش من جودة موديلاتها