تقرير تراخيص المرور.. تفاصيل عجيبة وغريبة ومريبة

تقرير تراخيص المرور لشهر أغسطس طلع النهاردة ، التقرير مليان أرقام واحصاءات من يناير وحتى أغسطس 2024، علامة هيونداي تصدرت تراخيص المرور من بداية السنة وحتى أغسطس بـ8924 وحدة ، وجاءت علامة كيا في الترتيب الثاني بـ7723 وحدة ، والمركز الثالث كان من نصيب علامة شيري بـ7348 وحدة.

طبعا حننشر تفاصيل كتير على "مارشدير"، لكن لو قارنا أرقام تقرير التراخيص بأرقام تقرير الـAmic حنلاقي تفاصيل غريبة وعجيبة، منها على سبيل المثال..

عربيات الاستيراد الشخصي أو مبادرة المغتربين حجمها ضعف عربيات الوكلاء بدون مبالغة ، طبعا نستثني التجميع المحلي.

يعني مثلا لو اتكلمنا عن كيا سبورتاج باعتبارها أكثر عربية بتبيع في السوق حنلاقي انه تم ترخيص 3770 عربية من يناير حتى يوليو 2024، في حين ان الوكيل وحسب الأرقام الرسمية بايع 1837 وحدة بس، يعني المستورد اكتر من ضعف الرسمي.

لو جينا لـMG ZS اكتر عربية صيني مبيعا، حنلاقي نفس الأمر، الوكيل باع 1026 وحدة في حين تم ترخيص 2483 وحدة في نفس الفترة.

الأغرب والأعجب عربية زي متسوبيشي اكليبس كروس تم ترخيص 1381 وحدة منها في مقابل الوكيل بايع 208 عربية بس. يعني تقريبا 7 أضعاف مبيعات الوكيل.

طب خد دي.. نيسان صنى وحسب تقرير الـAmic باعت 6548 عربية ، في حين تم ترخيص 3197 عربية بس، يعني أكثر من نص عربيات صنى تم تصديرها.

أومال تويوتا كورولا فين ؟

أهو كورولا بالذات حاجة مختلفة، تم ترخيص 3293 وحدة في حين ارقام الوكيل الرسمية بتقول انه باع 3023 وحدة يعني تقريبا هي الموديل الوحيد اللي الاستيراد فيه مش مرغوب عن الوكيل.

و بناء على أرقام كورولا من تقريري التراخيص و الـAmic يظهر لنا ان تويوتا كورولا هي اكثر موديل يتم بيعه بشكل رسمى في 2024 حتى الآن.

بالمناسبة .. عدد تراخيص لامبورجيني نفس فيراري، 11 عربية لكل علامة، أما علامة رولزرويس فتم ترخيص 5 كولينان بس. بكرة نكمل ملاحظات