كورولا حتفضل كورولا... ملاحظات من واقع تقرير الـAmic

قراءة تقرير الـAmic للمبيعات بيديك رؤية أفضل للسوق، بتشوف أداء الشركات وتحديدا في العربيات الجديدة وقابلية العملاء للاقبال عليها وشراءها، وكمان بتشوف الوضع المأساوي لسوق السيارات في مصر.. وقبل ما نشوف الملاحظات لازم نعرف ان في وكلاء غير مشتركين في الـAmic ونقطة تانية اننا حنتكلم عن الفترة من يناير الى يوليو2024 ،بغض النظر عن توافر الموديلات ، فوقف الاستيراد على الجميع تقريبا.

تعالو نشوف الملاحظات مع بعض..

تويوتا تفضل تويوتا.. اتكلمت من فترة عن انواع العملاء في مصر وقلت ان اهمهم انسان التويوتا.. عايز حاجة مضمونة سواء في الاعتمادية أو اعادة سعر البيع ، تلبي متطلباته وفي نفس الوقت عربية شيك يبقى مفيش غير كورولا.

تويوتا كورولا هي رقم 1 في مبيعات السيارات المستوردة في شهر يوليو بـ477 وحدة ، وهي الأولى بدون منازع في المبيعات من يناير الى يوليو بـ3023 وحدة.. كورولا في الترتيب العام رقم 3 بعد نيسان صني وهيونداي اكسنت.

مش بس كورولا .. الملاحظ كمان لاندكروزر محققة في نفس الفترة مبيعات 410 وحدة، طب خد دي .. لكزس LX بايعة 48 وحدة (بتبدأ رسمي من 10 مليون جنيه)

MG ZS تفضل هي البريمو ما بين موديلات العلامة، اكتر مبيعات، الفكرة ان MG5 مش في المركز الثاني، MG RX محققة مبيعات 805 وحدة وبعدها MG5 بـ773 وحدة.

لو اتكلمنا عن الاوربي المنشأ حنلاقي ان الثلاثي أوبل وبيجو وستروين بنفس الترتيب في المبيعات، أما رينو فطبعا رقم 1 في المبيعات بـ999 وحدة، ويبدو ان فيات عندها أزمة كبيرة في الاستيراد، لانها محققة مبيعات 257 وحدة فقط من موديل تيبو.

حسبة تانية، الشركات الاوروبي المذكورة ،جميع مبيعاتها من يناير الى يوليو2024 تقريبا نفس عدد مبيعات تويوتا كورولا لوحدها.

وعشان أكون دقيق، تقرير الأميك عبارة عن مبيعات الوكلاء يعني ممكن وكيل يجيب شحنة 200 عربية مثلا ويبعتها للموزعين وتحتسب عنده مبيعات.. بكرة نكمل كلام عن التقرير