مدى سير 1350 كيلومتر .. محرك جديد من Exeed وشيري.. الصينيين أهمّا

حتسمع الأيام الجاية كتير عن مصطلح EREV وده اختصار لـ extended-range electric vehicle مدى اضافي لمركبة كهربائية، طب ليه حتسمع عنه كتير الفترة الجاية؟

لأن كل شركات العربيات في العالم عارفة وفاهمة ومتأكدة من قلق المستهلك من مشكلة شحن بطارية العربية الكهربا خصوصا اثناء السفر لمسافات طويلة ، وللسبب ده في سباق محموم للوصول الى حل للمشكلة دي، وفي الغالب التوجه بيكون بمحرك عادي يوّلد كهربا لشحن البطارية أثناء السير، ومش بس كده ، الأهم الوصول لأقصى مدى سير ممكن.

في شهر أبريل الماضي علامة Exeed كشفت عن عربية جديدة اسمها Exlantix ET، طبعا عربية كهربا "فخيمة" جدا واسعارها في متناول الطبقة الثرية.

المهم يا سيدي، الصبح كنت معاهم في اجتماع اون لاين ،كان عنوانه الثورة التكنولوجية في المحرك الجديد بتاعهم، وازاي طوروه بشكل جماعي كمجموعة شيري.

الفكرة انهم فعلا فخورين جدا بتطوير المحرك، وإزاي وصلوا لكفاءة حرارية 44.5%، وتقريبا دي أعلى نسبة وصل ليها محرك في العالم، ومن ضمن الشرح كانت المقارنة بين محركهم ومحرك BMW X7 هايبريد وأودي Q7مايلد هايبريد، عشان لمّا أقولك همّا فعلا مش شايفين منافس ليهم غير "الفواخر" تقتنع.

المحرك الجديد تم اضافته لإصدار Exlantix ET Range Extender Max اللي بيحقق كفاءة تحويل وقود إلى كهرباء ممتازة، 3.65 كيلوات/ساعة من توليد الكهربا لكل لتر بنزين وبيستهلك 5.2 لتر لكل 100 كيلومتر، خد بالك دي عربية دفع رباعي ، يعني توفير رهيب في استهلاك الوقود ، ده غير ان مدى المسافة بيوصل لـ1515 كيلومتر بالتفويلة الكاملة والشحن الكامل ، بس ممكن على ارض الواقع يعمل مدى سير 1350 كيلومتر، وبالمناسبة خزان الوقود سعة 70 لتر.

طب احنا ايه علاقتنا بالموضوع ده؟

علاقتنا ان عربية Exeed حتبقى متاحة للشرق الأوسط ومن ضمنها مصر في 2025، مش كده بس، المحرك ده حيتم تزويد بعض موديلات شيري بيه، وبرضه وارد نلاقيه في مصر في 2025 في تيجو 9 او بالإسم الجديد Lepas.