ممكن تكون BMW السبب ورا استقالة أو"إقالة" كارلوس تافاريس؟!

حديث سوق السيارات العالمي كله عن استقالة كارلوس تافاريس الرئيس التنفيذي لمجموعة ستيلانتيس، تقريبا مفيش وسيلة اعلامية منشرتش الخبر وكمان اضافت تحليلات عن الاستقالة المفاجئة وأسبابها.

والبيان الصادر عن ستيلانتس وضّح ان في خلاف في وجهات النظر بين تافاريس ومجلس الإدارة، وفي كلام ان قرار قبول الاستقالة كان باجماع أعضاء مجلس الإدارة ، وبعد البيان اسهم ستيلانتيس انخفضت اكثر من 8%.

عارف لمّا تلاقي مثلا ليفربول قرر يفسخ عقد محمد صلاح ، نفس القصة كده بالنسبة لستيلانتيس وكارلوس تافاريس

تافاريس هو صاحب قرار شرا أوبل وقرار اندماج فيات في PSA لتشكيل ستيلانتيس، اللّي تعتبر رابع أكبر مجموعة صناعة سيارات في العالم بعد تويوتا وفولكس فاجن وهيونداي جروب، يعمل بها 250 ألف موظف ومحققة أرباح محترمة جدا في 2023 ، ويمكن يكون ده سبب الدهشة لإقالته أو استقالته ، كارلوس تافاريس (66 سنة) حصل على 36.5 مليون يورو "أرباح" سنة 2023، وعقده ممتد لـ2026، ولسة متمش اعلان حصوله على تعويض باقي عقده.

لكن رغم أرباح ستيلانتيس، فخسائر المجموعة الكبرى متركزة في السوق الامريكي، وتحديدا في مجموعة كرايسلر (كرايسلر،دودج،جيب،رام)، والمشاكل الكبيرة برضه جاية من نقابة عمال السيارات المتحدة الأمريكية (UAW).

وهنا لازم نقول حاجة مهمة.. مجموعة كرايسلر تقدر تقول عليها انها "نحس"، دخلت في شراكة مع دايملر"مرسيدس" وجابوها الأرض، وبعد الانفصال فاقت مرسيدس وكمّلت كرايسلر وقوع ، شوية وفيات عملت 7 رجّالة واشترت كرايسلر، وهوب بقت الأرباح تعوض خسائر كرايسلر، ولمّا جت PSA وعرضوا الاندماج مع فيات، وافقوا فورا ، وبقت مجموعة ستيلانتيس، وبرضه الخسائر المهولة ووجع الدماغ جاي من "كرايسلر".

بس في حاجة كانت غريبة جدا حصلت قدامي، في اليوم الأول لمعرض باريس الخاص بالصحفيين، وتحديدا في جناج BMW لقيت كارلوس تافاريس بيعمل مقابلة مع صحفيين ، في الأول اعتقدت دردشة عادية بس لمّا قربت لقيت ان في حوار فعلا ومترجم.. رئيس ستيلانتيس سايب أجنحة بيجو وستروين والفاروميو وبيعمل حوار في جناح BMW. وبعد أقل من شهرين يحصل اللّي حصل.