ستروين C4X فيس ليفت الجديدة.. في مصر وتجميع محلي كمان

في معرض باريس للسيارات كان جناح ستروين في عربيات جديدة كتير، وكان ليه اهتمام كبير من الصحفيين وكمان من الزوار تاني يوم ، وكانوا عارضين عربيات آمي  بشكل مميز ، لكن الأهم بالنسبالي انهم عرضوا الفيس ليفت الجديد من ستروين C4X و C4 ، وانهم حينزلوا بمحرك Ice ونسخ كهربائية وهايبريد، ويمكن كنت من أوائل الصحفيين اللي شافوا العربية.

طيب ايه المهم بالنسباالك؟

حلو أوي.. سعادتك خلال الربع الأول من 2025 حيكون السوق المصري على موعد مع ستروين C4X تجميع محلي ،وممكن نعتبرها السيارة الأوروبية الوحيدة اللي بتتجمع في مصر بمحرك اقل من 1600 سي سي والأهم انها حتكون موديل حديث وحيتم طرحها بعد ما تبدأ عمليات بيع في اوروبا بشهرين اتنين بس، يعني مش جيل قديم ولمّا ينتهي نبدأ تجميعه زي ما جرت العادة في مصر قديما.

تجميع ستروين C4X حيبقى حدث مهم في مصر، لان شركة ستيلانتيس كسرت مفهوم ان التجميع للصيني وللعربيات ذات المحركات الكبيرة بس، حيبقى عندنا عربية أوروبي أخت اللّي بيتم انتاجها من مصنع مدريد في اسبانيا، وبنفس الجودة،وحيتم تجميعها في الـAAV.

صحيح يمكن تجميع العربية ميكنش ذو جدوى اقتصادية، وان استيرادها اسهل وارخص من تجميعها، لكن دي مرحلة لازم نمر بيها ان كنا جاديين في الدخول في صناعة سيارات حقيقية.

موديلات كتير يعني مصانع مكونات تكبر وتزود استثماراتها، وكمان تشّجع المستثمرين على الدخول في صناعة مكونات محلية غير متاحة حاليا.

أيوة يعني العربية المحلية حتكون أغلى من المستوردة؟

محدش لسة عارف الأسعار، لكن بالتأكيد حتكون أرخص بس مش بدرجة كبيرة ، ستيلانتيس بقرار تجميع الـC4X أحرجت باقي العلامات في موضوع التجميع المحلي، انا عايز أقولك ان القرار تم اتخاذه بالتجميع في أقل من 6 شهور ، وبالفعل بدأ تركيب خطوط الانتاج وحنشوف العربية خلال الربع الأول "آخر فبراير أو أوائل مارس" ، يعني القصة كلها في أقل من سنة.